M'laya-in state finance commission a din

Meghalaya Chief Minister Mukul Sangma chuan state chhunga Autonomous District Council(ADC) pathum leh local body te sum inrelbawlna chungchang zirchianga, rawtna siam­tu atan State Finance Commission din a ni, tih Ningani khan a sawi.

"ADC leh municipal body te hnena fund pekchhuah dan chak zawk a awm theih nan kawng dang kan ngaihtuah a ni," a ti.

Khasi Hills Autonomous District Council (KHADC) chuan tun hnai khan fund dawn dan rang leh chak zawk ruahmansak turin state sorkar a ngen a ni.

Chief Minister Mukul chuan an hmalakna thar chu local body te tana state sorkar inpekna tilangtu a ni, a ti.

KHADC chuan an huamchhunga ram leilung hausakna thilah state sorkarin chhiah a lak aṭanga ADC chanvo a rang lama pek an ngen a, he thila chhiah lak dan chipchiar takin hriattir turin a ngen bawk.

14th Finance Commission-in ADC te tana a hrana fund a ruahmansak lo chu Chief Minister Mukul chuan sorkar laipuiah thlen a tum thu a sawi bawk a, hetihlai hian sorkar laipuiin chhiah aṭanga sum a lakluhte ADC te chanvo chu a rang lamin a pe ve tur a ni tia 14th FC-in sorkar laipui hnenah rawtna a siam chu lawmawm a tih thu a sawi bawk. Finance Commission rawt­na chuan state sor­karin sorkar laipui aṭanga

ADC te tana fund hai­chhuahsak a tum kawng­ah awlsamna a thlen a rin thu a sawi bawk.

KHADC CEM Adelbert Nongrum pawhin 14th Finance Commission rawtna chu sawisel­in, ADC te a ngaihthah a ni, a ti a, 14th FC-in a hrana ADC te sum a ruahmansak loh chung­changah hmarchhak biala ADC te telna joint force din chungchang rel turin meeting neih thuai an tum thu a sawi

Hetihlai hian Meghalaya Chief Minister chuan zirtirtute thla hlawh tihpun nan state sorkarin sum a neih loh thu a sawi bawk.

Mukul chuan he thu hi Ningani khan Joint Action Committee of All Teachers’ Association of Meghalaya (JACATAM) palaite hnenah a sawi a, state sum dinhmun ngaihtuahin kumin chhungah zirtirtute thla hlawh an tihpun theih a rin loh thu a sawi.

Chief Minister Mukul chuan zirtirtute thil phut chu theihtawp chhuaha bawhzui zel a tum thu a sawi bawk.