Dimapur-ah curfew puan chhunzawm zel

Kar kalta Ningani, March 5-a pawngsual duh loh avanga mipui kawng zawhte'n Dimapur jail-a tâng, pawngsualtua puh an sawisak hlum avanga district thuneitute'n Code of Criminal Procedure (Cr PC) section 144 tlawhchhana curfew an puan chu chhunzawm zel a ni.

Dimapur district De­puty Commissioner (DC) Kesonyu Yhome-a'n thuchhuah a siamah Dimapur boruak chu a la ṭang hle niin a sawi a, hei vang hian curfew pawh puan chhunzawm zel a ni, a ti.

"Thupek thar chhuah a nih hma chuan Dimapur khawpui chhungah mi panga emaw a aia tam awm phal lohna thupek chu lekkawh zel a ni ang," a ti. Hetihlai hian District Magistrate chuan nimin tlai dar thum aṭang khan zan dar 12 thleng total curfew a puang bawk. Total curfew hi boruak awm dan azirin darkar 48 chhung neih a ni phawt ang.

Nagaland IGP (Range) Wabang Jamir chuan tharum thawhna chhuak thar a awm tawh loh thu sawiin, boruak erawh a la ṭang hle niin a sawi.

Hetihlai hian pawngsualtua rinhlelh, mipui kut tuara thi Syed Farid Khan ruang chu a pianna khua nia sawi, Assam, Karimganj district-a Bosla khuaah kar kalta Inrinni khan Army helicopter-a lak a ni. Khan hi Nagaland lam chuan Bangladesh mi niin an sawi thung.

Dimapur police te chuan jail chhunga pawngsualtua rinhlelh Khan-a luhkhung a, mipuite tha­rum thawhna chawk­chhuaktua rinhlelh paruk an man thu a sawi bawk.

Dimapur-a thilthleng avang hian Muslim mite leh Naga mite inkarah buaina lian tham zawk a chhuah venthawn thilah Nagaland sorkar chuan Telecommunications Ministry biain, darkar 48 chhung Nagaland-ah SMS service leh social networking sites te titawp rih turin a ngen a, kar kalta Inrinni khan state sorkar ngenna hi tihpuitlin a ni.

Kar kalta Ningania thilthleng vangin Dimapur DC Wezope Kenye, SP Meren Jamir leh Superintendent of Dimapur Central Jail B Chuba Phom te chu Zirtawpni khan a suspend nghal a, DC Kenye aiawh turin Kesonyu Yhome ruat a ni.

State sorkar chuan thil­thleng chhuichiang turin District & Sessions Judge hlui, Veprasa Nyekha a ruat nghal bawk a, ni 45 chhunga report thehlut tura beisei a ni.