GNLA-in bandh huaihawt dawn

Garo National Liberation Army (GNLA) chuan West Garo Hills district, Origitok khuaah police te'n hel tia sawia mi pakhat an kahhlum avanga an lungawi lohna lantir nan vawiin hian Garo Hills huamchhung­ah darkar 12 awh bandh an huaihawt dawn.

Security force te laka Garo Hills-a thingtlang khua te tawrhna chu thil­thleng reng a ni, a ti a, Ori­gitok khuaa police te kuta thi pawh chhuichian an phut thu an tarlang bawk.

GNLA chuan sorkar­in an thil phut a tihpui­tlin hma chuan Ampati bialah tiam chin awm loa bandh huaihawt an tum thu a tarlang bawk.

Police te kuta thi hi Sengbat Ch Marak a ni a, Oragitok khua Nokma fapa a ni. Marak-a thihna hi Garo Students Union (GSU), All India Garo Union (AIGU), Federation of A’chik Freedom (FAF), Mothers’ Federation, AYF leh ICDS te pawhin an dem thu an tarlang bawk a, mimal inhuatna avanga thilthleng a ni, an ti.

NGO te hian Marak-a thihna thlentu Romba Ading khuaa inkahna hi phuahchawp a ni, an ti a, SWAT team hma hruaitu, Circle Inspector Bitcheng Marak-a'n a fuihpawrh vanga thleng a ni, an ti. NGO te chuan SWAT team-ah hian Garo National Liberation Army (GNLA) hel bang te pawh an tel tiin an sawi a, tu in nge hel bangte hi police operation-a tel phalsak tiin zawhna an siam bawk.

GNLA chuan Marak-a thihna chu hel te leh police te inkahna ni loin mi pawisawi lo thahna a ni, an ti.