Assam-in sum indaihlohna nei dawn tawh lo

Fourteenth Finance Commission (FFC) chuan Assam chuan kum 2017-2018 aṭangin sum indaihlohna a neih tawh loh tur thu a tarlang.

Revenue estimate zirchiannain a tarlan danin, Assam chuan 2015-2016-ah vaibelchhe 2,191 leh kum 2016-2017-ah vaibelchhe 1,188 revenue deficit a nei ang a, kum 2017-2018 aṭang chuan revenue surplus vaibel­chhe 210 a nei tawh zawk dawn a ni. Assam hian revenue a lakluh aṭanga a senso tura ruahman aṭanga sum chuang hi kum 2018-2019-ah vaibelchhe 1,953 leh kum 2019-2020-ah vaibelchhe 3,387 a nei dawn a ni.

Assam hian sorkar laipui aṭangin grants-in-aid-ah vaibelchhe 3,379 a dawng dawn a, mahse sum hi 2015-2016 leh 2016-2017 chhungin instalment vawi hniha pek a ni ang.

14th FC aiin 13th Finance Commission chuan Assam chu sum a ruahmansak tam zawk a, 13th FC chuan grant-in-aid-ah cheng vaibelchhe 5,512.10 a ruahman­ sak a ni.

Union Finance Minister Arun Jaitley chuan Assam grant-in-aid dawn tur instalment-a pek a nih chhan sawiin, Assam-in surplus revenue a neih tawh dawn avanga instalment-a pe an nih thu a sawi. Hmarchhak state zingah revenue deficit nei state te chu- Assam, Meghalaya, Mizoram, Manipur, Nagaland leh Tripura te an ni.

Assam hian grant-in-aid hi instalment vawi khatnaah vaibelchhe 2,191 a dawng ang a, a vawi hnihnaah vaibel­chhe 1,188 a dawng ang.

Chief Minister Tarun Gogoi chuan tunhnai khan 14th FC rawtna chungchang chu assembly-ah sawichhuakin, grant-in-aid tihtlemsak an ni chu a ngaihmawh thu a sawi a, MLA te chu 14th FC rawtna chung­changah âw chhuah ṭheuh turin a ngen.

"Grant-in-aid kaltlanga 14th FC-in sum min ruahmansak hi kan dodal a ngai a ni," tiin state assembly inkhawmah a sawi.

Gogoi chuan Assam-ah chak zawk hmasawnna kalpui a nih theih nan special category state-a dah a duh thu a sawi bawk.

Assam Chief Minister chuan sorkar laipuiin an state duhsak lo mah se a kaihhruai sorkar chuan theihtawp chhuahin hmalam pana kal zel a tum thu a sawi bawk a, sorkar laipuiin North East Industrial and Investment promotion Policy, 2007 (NEIPP) hnuaia registration thar a tihtawp avang leh fund tam tak a tihkhawtlai avangin hmasawnnain a tawrhphah dawn a ni, a ti.

Assam sorkar hlawh­tlinna tarlangin Chief Minister chuan kum 2011 aṭangin gross state domestic product leh per capita income pawh a sang chho mek zel a ni, a ti.

"Human Development Index pawh a ṭha lamin a kal chho zel a, mahse tihtur tam tak a la awm a ni. Kan GSDP ṭhanna pawh national average aiin a sang a, kum 2001-a growth rate 1.51% aṭangin kum 2013-14-ah chuan a ṭhanna zat hi 6.88% a ni tawh a ni," a ti.