Manipur CM leh IDP aiawhte an inkawm

Manipur tualchhung buaina avanga an chenna hmun chhuahsana state chhunga raltlan, Internally Displaced Persons (IDP) aiawhte leh chief minister N Biren Singh chu kar liam ta Inrinni khan CM chenna hmunah an inkawm. He hunah hian raltlante mamawh leh harsatna hrang hrangte sawi ho a ni.

Manipur buaina avang hian state chhungah raltlan mi 59,564 awm nia tarlan niin Manipur cabinet chuan ṭanpuina sum, chhawngkaw khat tana Rs nuai 1 pekna tur chu a pawm tawh a ni. Chhungkaw 2792 hnenah ṭanpuina sum, first installment Rs 25,000 pek a ni tawh.

Manipur CM nen an inkawm ṭum hian raltlan aiawhte chuan hriselna chungchang leh zirna mumal awm loh vanga harsatna an tawh thu an thlen bakah inbenbelna hmun tur mumal an neih loh vangin an buai tih an tarlang bawk. Heng an harsatnate ching fel tur hian CM Biren Singh chuan hmalak a tiam.

IDP-ten hriselna leh zirna kawnga an harsatna thlenna tur, grievance cell chu inkawmna an neih zawh hnu hian din a ni dawn tih Biren Singh chuan a puang a ni. Hemi bakah hian IDP-te tan JNIMS leh RIMS-ah medicine counter hawn a ni anga, heng hmun aṭang hian sum lama harsatna neiten a tahtawla rulh turin damdawi an lei thei ang.

IDP card neite tan Manipur transport department enkawl bus-ah a thlawnin a chuan theih dawn bawk. Manipur MLA-te chu thla tin ni 15 ral hnuah chhawmdawlna-ina awm, IDP-te dinhmun enfiah ṭhin tura hriattir an ni bawk.