Nagaland : NSCN-in zan lam intihhlimna hmuna kum tling lo chhawr lo turin hriattir

National Socialist Council of Nagaland (NSCN) chuan Dimapur chhunga nightclubs, bars, lounges leh zu zawrh telna restaurant-te chu kum tling lo naupang chhawr lo turin a hriattir. He hriattirna hi hman ṭan nghal tur niin kum tling lo naupangte hi an hung chhunga luhtir lo turin thu an pe bawk.

NSCN kaihhruai sorkar, Government of the People's Republic of Nagaland (GPRN) hnuaia media and information bureau chuan kum tling lo naupangte chu thawktu anga chhawr ni mah se tihduhdahna an tawk ṭhin niin an tarlang. Heng nightclub-ahte hian kum tling lo chhawr leh customer anga luhtir chu khap ve ve a ni tih an sawi.

Dimapur chhunga zan lama inhawng ṭhin, intihhlimna hmunte chu uluk taka endik an nih dawn thu sawiin, an thupek chhuah zawm lote chungah hremna an pe dawn a ni. Hemi bakah hian heng hmuna kum tling lo an hmuhte chu hremna an pek loh nan chhungte an inrawlh a ngai dawn tih sawiin bond an sign hnuah chauh chhuah an ni ang, an ti bawk.

NSCN thuchhuah hian kum tling lo naupangte tan heng hmun hi a him loh bakah anmahni leh khawtlang nunah nghawng ṭha lo zawk a thlen thei a ni tih an tarlang. Heng intihhlimna hmunte hi ram changkang zawka an tih ṭhin dan zawmin kum tling lote chu luhtir lo leh chhawr lo turin an hriattir a ni.