Assam : Congress-in an sorkar chuan Himanta chhui an intiam

Assam Congress president Bhupendra Borah chuan inthlan lo awm tura sorkarna an siam a nih chuan ni 100 chhungin an chief minister Himanta Biswa Sarma chhui chiang turin Special Investigation Team (SIT) an din dawn tih a sawi. SIT hi Himanta leh a minister-te hausa chak lutuk chhui tura din an tum a ni.

Bhupendra Borah chuan mipuite chan ai dik lo taka laksak tawhte chu pek kir leh a nih tur thu sawiin, kum 2026-a Assam assembly inthlan neih huna hnehna an chang a nih chuan sorkarna siam mektu, BJP chu eiruk thubuaiah chhuichian ngei an tum tih a sawi.

Himanta leh a minister-te eirukna chungchangah Borah hian a lo bei fo tawh a, Himanta chu a chhungte sumdawng duhsak bikah a puh bawk. Himanta hian tun hnaia chanchin thehdarhtute a hmachhawn ṭumin an puhnate hi a pawm niin Borah chuan a sawi. Hemi bakah hian a kaihhruai sorkar chu eiruknaa fihlim lo a ni tih a pawm niin Borah chuan a sawi bawk.

ULFA-I in zalenna ni lawmna tibuai tura bomb 24 an kam thu an sawi hnuah Borah hian Assam CM chu bang turin a lo nawr tawh bawk. Borah chuan state venghim zo lo leh hmasawnna thlen loah BJP sorkar chu a puh a, Himanta chu thil ṭul ngai pawimawh loah puhin 'jihad' leh a chhehvela buai mai mai a ni tih a sawi.