AJP President atan Lurinjyoti Gogoi ruat

19th December, 2020

Assam-a zirlai pawl lian pahnih, All Assam Students' Union (AASU) leh Assam Jatiyatabadi Yuva Chatra Parisha-in political party an din thar, Assam Jatiya Parishad (AJP) President atan AASU general secretary hlui, Lurinjyoti Gogoi chu ruat a ni.

Ningani-a Sivasagar-a party convention hmasa ber neihah zirlai hruaitu hlui, Lurinjyoti Gogoi hi party hruaitu lu bera tana puan a ni. Party president atana ruat a nih hnua thu a sawiah Gogoi chuan, Assam leh Assam mipuite dinhmun chu national party-te lakah chuan a him tawk lo a ni tih sawiin, hun rei tak tihder leh bumin an awm tawh tih a sawi. Hei vang hian an state leh state mipuite venhimna tur chuan regional party chak ṭha tak a awm a ngai a ni, a ti.

AJP President chuan, "Kum 2021 assembly inthlanah chuan regional government a ding dawn tih Assam mipuite ka tiam duh a ni. Assam mipuite aiawhtu dik tak sorkar a ding dawn a, hei hi tumahin an dang thei lo ang," tiin a sawi.

Minister hlui Jagadish Bhuyan chu party general secretary atan ruat a ni a, Asom Gana Parishad (AGP) MLA, tun kar tir lama a party chhuahsana AJP zawmtu, Pabindra Deka chu working president atan ruat a ni bawk. Vice president leh secretary hrang hrang atan mi 11 ve ve ruat an ni bawk.

Sivasgar-a Convention-ah hian party constitution pawh siam nghal a ni a, 19-point political resolution pawh an pass bawk. Citizenship Amendment Act (CAA), National Register of Citizens (NRC) leh Clause 6 of Assam Accord of 1985 chungchanga party dinna hmunte pawh sawilan a ni.

AJP hi AASU-in political party a din pahnihna a ni. Kum 1985-a Assam Accord ziah a nih hnu lawkah khan AASU hian political party thar, Asom Gana Parishad (AGP) a lo din tawh a ni.

Nakkuma assembly inthlan tur thlirin, Assam-ah hian political party thar dang pawh din a ni bawk. CAA dodalna lantirnaa a hmahruaitu, Krishak Mukti Sangram Samiti (KMSS) chuan political party thar, Raijor Dal a din tawh bawk a ni. Jail-a tang mek, KMSS hotu Akhil Gogoi chu jail aṭanga a chhuah hunah he party hruaitu atan hian dah a ni ang.

Akhil Gogoi chuan an state-a rorellai, BJP chu paihthlak a nih theihna atan regional party hrang hrangte chu thawkho turin a ngen.