Meghalaya HC-in temple leh dawrah sarang hman a khap

Meghalaya High Court chuan state chhung a thianghlim theih nan hman-khat-daih-sarang chu state chhunga temple leh dawra hman a khap. Court chuan plastic hmang lo tura hmalakna hi environment humhalh nan chauh ni loin khawvel hmalam hun atan leh hriselna ṭha an neih theih nan a pawimawh tih a tarlang bawk.

Hman-khat-daih sarang khapna tura thutlukna hi HC Division Bench, Chief Justice S. Vaidyanathan kaihhruai siam niin plastic vanga state chhung bawlhhlawh zel tur ven chu thil hmanhmawhthlak a ni, an ti. High Court chuan plastic thlaktu atan tetra pack cartons hmang turin thurawn a pe bawk.

Meghalaya HC chuan an thupek tihchhuah chu zawm a ni tih endik nan temple-a CCTV camera dah turin temple hotute chu a hriattir a, hemi hmang hian temple chhunga plastic keng luttute a hriat theih dawn a ni, a ti.

Meghalaya chhunga dawr neitute pawh plastic dah khawl lo tur leh hmang lo tura thu pek niin, a zawm lote chu pawisa chawitir an ni dawn tih Court chuan a tarlang bawk. Hrem an nih hnua an ti lui leh a nih chuan an dawr kharsak thlenga hmalak a ni ang.

Meghalaya sorkar chu an thupek bawhzui tura chahin plastic leh a kaihhnawih dangte chu state chhunga a luh loh nana ṭan la turin a hriattir a, hunbi neiin dawrte chu endik ṭhin turin a chah bawk. State chhunga plastic hman a tlem theih nan dan lekkawh ṭhat a ngai tih a sawi bawk.