Manipur-in Covid-19 care centre siam belh dawn

Manipur sorkar chuan an state chhunga coronavirus kai an pun belh zel avangin Covid-19 care centre siam belh a tum. 

Principal secretary for health & family welfare V Vumlunmang chuan hri leng vanga khuahkhirhna siamte thlahdul a nih hnuah hri kai hi an pung chho leh nasa  hle tih a sawi. Mahse test positivity rate (TPR) hi national TPR aiin a la hniam hle a, 4.5% niin mortality rate (MR) hi 0.7% a ni a, hei vang hian Virus Spread Assessment Matrix (VAM)-ah chuan Manipur hi green zone-ah a la awm chhunzawm tho a ni. 

Vumlunmang chuan lockdown thlahdul a nih hnuah mipuite chu pawm chhuakin hna an thawk ṭan a, hei bakah hian programme hrang hrang siam chhoh a ni zui a, hei vang hian hri kai hi an pung chho leh niin a sawi. 

Manipur-ah hian hri kaite enkawl­na tur Covid-19 Care Centre hi 36 awm mekin, khum 2,500 chuang a awm. JNIMS leh RIMS hospital-ah hri kaite enkawlna tur bik ward pawh siam tel a ni bawk. 

Manipur-ah hian Covid-19 kai hmuh chhuah mi 15,463 an awm tawh a, an zinga 11,761 chu enkawl dam an ni tawh a, mi 116 in an thihpui thung.