AP sorkarin Covid warrior thi Rs nuai 50-in ral

Arunachal Pradesh chuan an state-a Covid-19 dona kawnga thawktu, July 14-a a duty-na lama motor accident-a thi, contingency driver Sangpuia Tayo chu cheng nuai 50 in a ral. 

Deputy chief minister Chowna Mein chuan Ningani khan Tayo chhungte hnenah ralna hi a hlan a, sorkarin an chhungkua chu a theih anga a puih zel tur thu a hrilh nghal bawk. He hunah hian health minister Alo Libang pawh telin, Covid-19 dona kawnga thawktu hrang hrang inpekna te fakawm a tih thu a sawi. 

Libang chuan an state-ah hri kai dam tawh an pung zel tih sawiin, ram chhunga recovery rate sang ber dawttu an ni mek tih a sawi. Mipuite chu hri leng chungchangah chiai lo tura chah nawn lehin, hri darh tur venna atana sorkarin kaihhruaina a siamte zawm ṭha a, midang nena inhlata awm tura ngenna pawh zawm zel turin a ngen bawk. 

Arunachal Pradesh-a West Siang district-a DJ night hmannaa tel, mi 46 zinga 13-te chuan Covid-19 an kai tih hriat a ni. 

DJ night hi West Siang district headquarters, Aalo khaw dai, Yomo lui kamah buatsaih a ni. He huna tel, Cozy Bar neitu chu party zawh hnuah symptom a neih avangin inringhlelin a in test a, Covid-19 a kai tih hriat a ni ta a ni. Hemi hnu hian contact tracing tih nghal niin, mi dang 12-te pawhin hri hi an kai tih hmuh chhuah a ni.