NEDA convener-in Tripura tlawh dawn

North-East Democratic Alliance (NEDA) convener leh Assam minister, Himanta Biswa Sarma chuan Tripura Tribal Areas Autonomous District Council (TTAADC) inthlan neih tura BJP thawhpui, regional party IPFT nena seat insem dan chungchang tifel turin Tripura a tlawh dawn. 

Sarma zin hun tur hi sawichian la ni lo mah se, central BJP hruaituten seat IPFT nena seat insem dan tur chungchang hi a kutah an dah avangin a zin thuai rin a ni. 

Seat insem dan turah BJP leh IPFT hi an thu a inhmu lo a, hei hi chinfel thuai an tum a ni. IPFT hian seat 28 awmah seat 22 a phut a, an seat phut zat hi BJP national  president JP Nadda hnenah pawh an hriattir tawh a ni. 

Tripura state urban development department secretary, Kiren Gitte chuan thuchhuah siamin, state chhunga civil body inthlan neih hun tur chu nakkum February 27-ah sawn a ni tih a sawi. 

State chhunga civic body tam zawk term hi December thla hian a tawp dawn a ni. Urban local body hi 20 awmin, hengte hi Argatala municipal corporation pakhat, municipal council 13 leh Nagar panchayat paruk an ni. 

Civil body inthlan hun sawn hi eptu party-te chuan an sawisel a, ramchhunga state dangah pawh inthlan hi kalpui a ni, an ti. CPIM hruaitu Pabitra Kar chuan Kerala, Madhya Pradesh, Gujarat leh Hyderabad-ahte local urban body inthlan buatsaih a ni a, Bihar-ah pawh state assembly inthlan buatsaih a ni bawk tih a sawi. Tripura-ah chauh inthlan hun hi sawn a ni a, rorellai BJP chuan a chakna a hloh tawh a, inthlan sawn hma a hlau a ni, a ti. Hei vang hian inthlan hun hi sawnhlat a ni phah niina  sawi.