Nagaland-ah ni khatah hri kai dam 101 awm

Nagaland-ah Ningani khan coronavirus kai hmuh thar mi 49 an awm a, hemi ni vek hian hri kai enkawl dam 101 an awm thung. 

Hri kai hmuh tawh hi mi 4,066 an awm tawh a, an zinga 3,314 chu  dam leh tawhin mi pariatin an thihpui tawh thung. Hri vanga thite hi Dimapur mi vek an ni. 

Covid-19 kai zingah hian armed force mi leh sa 1,726 an awm a, state dang aṭanga haw mi 1,278, state chhunga midang aṭanga kai chhawng 765 leh frontline worker 297 an tel. 

Meghalaya-ah hri kai hmuh belh zel an la ni a, Ningani khan mi 109 in Covid-19 an kai tih hriat belh leh a ni. Anni nen hian state pumah hri kai hmuh chhuah mi 2,626 an awm tawh. 

Health Services director Aman War chuan hri kai hmuh thar zingah mi 78 chu East Khasi Hills-a mi niin, Ri Bhoi aṭang mi 13, West Garo Hills aṭangin mi 15, South Garo Hills-ah mi pahnih leh West Jaintia Hills-ah mi pakhat an awm tih a sawi. 

Hemi ni vek hian hri kai zinga 75 chu enkawl dam niin enkawlna  hmun aṭangin chhuah tir an ni a, hri kai dam tawh hi mi 1,393 an awm tawh. Hripui thihpui hi state chhungah mi 13 an awm tawh bawk.