Union HM-in dan leh thupek dinhmun siamtha turin Nagaland CM hriattir

Union Home Minister Rajnath Singh chuan Nagaland Chief Minister TR Zeliang chu Dimapur-a dan leh thupek dinhmun siamṭhatna atana hmala turin a hriattir.

Kar kalta Ninga­ni, March 5-a mipui thin­rim­in pawngsualtua rin­hlelh an chilhlum kaih­hnawihah Dimapur-ah hian boruak a la ṭang hle a, curfew puan a nih bakah security force ṭha­ hnem takin venhimna pawh khauh takin an kalpui mek a ni.

Pawngsualtua rin­hlelh, Syed Farid Khan hi Nagaland lam thu­chhuak chuan Bangladesh mi tiin an sawi a, mahse Assam, Karimganj district-a Bosla khawchhuak a ni tih finfiah a ni tawh a, kar kalta Inrinni khan a pianna khuaah a ruang lak a ni. Mipuite'n an sawi­sakna mobile phone video aṭanga a lan danin Nagaland police te chuan kutthlaktua rinhlelh mi 22 an man tawh bawk.

February 25-a manchhuah a nih hmain Khan hian Naga hmeichhe pakhat chu vawi eng emaw zat a pawngsual nia puh a ni. Khan hi Assam mi a nih avangin sawisak hlum a nih dana lung­awi lo eng emaw zat an awm bawk a, hei vang hian state pahnihte inkara boruak ṭha lo zawk a thlen venthawn thilah Nagaland sorkar chuan Telecommunications Mi­nistry chu Nagaland-ah SMS service leh social networking sites te titawp rih turin a ngen a, vawiin thleng hian internet leh mobile phone-a SMS inthawnna tihtawp a ni ang.

Nagaland Inspector General of Police (IGP) Wabang Jamir chuan internet leh SMS block chu a ṭul chuan pawhsei zel a nih tur thu a sawi. Home Ministry official pawhin Dimapur thil­thleng chu chhuichian a nih tur thu sawiin, engtin nge mipuite'n jail-ah lut a, jail tang an hruai­chhuah theih tih sawifiah tura Nagaland sorkar an hriattir thu a sawi.

Union Home Minister Singh pawhin Dimapur thilthlenga hmalak dan tur chu senior official te nen an ngaihtuah tawh thu a sawi bawk.

Hetihlai hian Nagaland sorkar chuan thil­thleng chu politics thila inbeihna remchanga hmang lo turin mitinte a ngen. Nagaland Home Minister Y Patton chuan Pathiannia thuchhuah a siamah Dimapur thil­thleng chu tipunlun lo tur leh politics-a inbeihna remchanga hmang lo turin Nagaland-a pawl hrang hrangte leh mipui­te a ngen thu a sawi. "Mipuite'n an kuta dan an lekkawh hi a vanduai thlak hle a, mipuite'n central jail a ṭanga pawng­sualtua rinhlelh an hruaichhuah hnuah saruaka kawng zawhpuiin an sawisa pah zel a, a thih hnuah mipui hmuh theiha a ruang an tar hi a demawm takzet a ni," tiin state Home Minister Patton chuan a sawi.