Statehood Act-a dan rintlak lohte paih turin Apang-a'n a ngen
Arunachal Pradesh Chief Minister hlui Gegong Apang chuan Statehood Act-a dan hrang hrang la tihpuitlin lohte leh dan rintlak lohte chu mipuite rilru tibuaitu a ni, tiin paih turin Prime Minister Narendra Modi a ngen.
Kum 2014 Lok Sabha inthlan hmaa BJP zawmtu, Apang hian hemi chungchangah hian PM Modi hnenah lehkha a thawn. Apang chuan sorkar laipui hruaitute'n Arunachal an tlawh ṭumin statehood act chungchang hi an sawipui ṭhin thu a sawi a, mahse engmah bawhzui a ni ngai lo, a ti. State assembly chuan statehood act chungchangah hian kum 1994 leh 2013 khan resolution a lo pass tawh thu sawiin Arunachal Chief Minister hmasa ber Apang chuan Arunachal Pradesh Statehood Act, 1986 chungchangah amah leh state hruaitu tuman rawn an ni lo, a ti. "Statehood Act emaw a draft bill hi kan hmu ngai lo a, a ṭhat lohna pawh kan hre lo a ni. Kum 1962-a China-in a India a run ṭuma India chak loh hnuah India sipaite chu North-East Frontier Agency (NEFA) chhuahsan tura hriattir an ni a, hemi ṭum hian Arunachal mite chu NEFA humhimtu an nih zia leh kan ram pawimawh zia sawiin Mizoram leh Goa rualin sorkar laipuiah state kan dil a ni," a ti.
A hun laia Prime Minister Rajiv Gandhi chuan statehood act-a dante tihpuitlin a nih theih nan India danpui amend a ni ang a ti a, mahse vawiin thlengin bawhzui a ni lo, tiin Apang chuan a sawi bawk. "Kan statehood act ṭhat lohna kan zirchian hnuah Prime Minister kan hmu a, Nagaland mipuite ram leh ram leilung hausaknate humhalhsak an nih laiin eng vangin nge Arunachal chu humhalh a nih ve loh bik ang? tiin kan sawi a, Prime Minister chuan statehood act-a dan rintlak lohte chu paihsak min lo tiam a ni," a ti.
Hetihlai hian Arunachal Governor chu hmarchhak state danga Governor te ang loin India danpui Article 371 hnuaiah thuneihna bik pek a ni bawk a, hei hi Arunachal khua leh tuite dikna chanvo leh zalenna palzutna a ni, tiin a sawi bawk. State assembly chuan India danpui hnuaiah Arunachal state chu a bika humhalh a nih theihna atana sorkar laipuia bawhzui zel tumin ṭum hnih resolution a lo pass tawh a ni.