Manipur-in swine flu monitoring cell a din

Manipur-a swine flu natna vei tun hnaia hmuhchhuah a nih hnuah state sorkar chuan 'Monitoring Cell Helpline for Swine Flu' a din.

Hetihlai hian Health Services director Okram Ibomcha chuan swine flu (H1N1) natna vei hmei­chhia pakhat chu private damdawi-inah dah hran a nih thu leh a dinhmun a ṭhat thu Pathianni khan a sawi a, mipa pakhat pawh natna veia rinhlelh a nih avangin a blood sample pawh enfiah tura thawn tawh a ni, a ti.

Manipur-a swine flu natna vei hmuhchhuah a nih hnuah state sorkar chuan Health Services department-a official te chawlh lak pawh a cancel nghal vek a ni. Health Director chuan natna enkawl nan, swine flu damdawi (Tami Flu) pawh ṭhahnem tak an dah khawl thu a sawi bawk a, natna veite dah hran nan JNIMS leh RIMS hospital-ah isolation ward siam a nih thu a sawi bawk. Manipur health director chuan sorkar laipui dan tlawhchhanin natna do letna atan state luhka emaw airport leh ramri-ahte screening an neih theih loh thu a sawi.