ABSU-in BTC chhuichian a phut

All Bodo Students’ Union (ABSU) chuan Bodoland Territorial Council (BTC) hnuaia scheme leh project hrang hrang kalpui mekah sum chingpen a awm thu tarlangin, Assam Governor PB Acharya chu chhuisak turin an ngen.

ABSU president Pramod Boro chuan Bodoland Territorial Area Districts (BTAD) huam chhunga Accelerated Irrigation Beneficiary Programme (AIBP) kalpuina atana contract hna chu BTC-a rorel lai party, Bodoland Peoples’ Front (BPF)-in an party mi leh sate hlir an pe tiin a sawi a, contract hna thawk tur lakna kalphung an palzut a ni, a ti.

BTAD huam chhung - Kokrajhar, Chirang, Baksa leh Udalguri district-a AIBP kalpui nan cheng vaibelchhe 171 ruahman a ni a, mahse irrigation facility a la chhe hle, tiin Boro chuan a sawi bawk.

ABSU president chuan BTC-a roreltute hnuaiah BTC Secretariat-a 'commission raj' awm ṭhinte chuan BTAD huam chhunga mipui nuai 31 te beiseina a tibo zo tawh a ni, a ti. BTC Secretariat inrelbawlna leh thuneihna inpek dan chu chhui chiang turin Governor a phut thu Boro chuan a sawi bawk. ABSU chuan BTAD huam chhunga sumdawng, mi hausa, pawl hrang hrang te leh mipuite chu BTC-a kalphung dik leh rintlak a awm theih nan eirukna leh rorelna dik lo do tlat turin a ngen bawk.