NDFB(S) helte lakah beihpui thlak chhunzawm dawn
Songbijit-a kaihhruai
National Democratic Front of Boroland (NDFB) hel pawlte tudai tura sorkar laipuiin security force leh police te hnena thla hnih hun a pek chu a tawp tawh a, mahse Ministry of Home Affairs (MHA) chuan hel pawl hruaitu lu man a nih hma chuan an laka beihpui thlak chhunzawm zel a nih tur thu a puang.
Nikum December 23-a Assam district pathum- Chirang, Sonitpur leh Kokrajhar district-a NDFB hel te'n mi 70 chuang an thah hnuah Union Home Minister Rajnath Singh chuan helte laka beihpui thlak a, nuaibo turin security force te leh police te chu thla hnih hun a pe a ni.
MHA official chuan NDFB hel, anmahni thawhpui te leh thlawptu mi 200 chuang man a ni tawh tih a sawi a, NDFB hruaitu lu man a nih hma chuan beihpui thlak chhunzawm zel a ni ang, a ti. Nikum December 23, Assam district pathum pawikhawihnaa a ruahmantu nia rin NDFB commander-in-chief G Bidai an man theih loh chungchangah MHA official chuan an thulakna aṭangin a awmna chin an hriat ṭhin thu leh a tlanchhiat hman avanga man lo an ni, a ti.
Hetihlai hian NDFB hotu, IK Songbijit leh a thawhpui eng emaw zat chu Myanmar ramah an awm nia sawi a ni a, Myanmar-ah hian an ram sipaite awm mahse NDFB hruaitute hi an bihruk avangin an la intawng fuh lo niin MHA official chuan sawi bawk.