Manipur-ah hripui thihpui 32 awm tawh

Manipur-ah Ningani khan Covid-19 thihpui mi pathum an awm belh leh a, he hri vanga thi hi mi 32 an awm tling tawh. 

Covid-19 Common Control Room chuan hripui vanga thi mi pathumte hi mipa vek, kum 35, 61 leh 65 mi an ni tih thu leh Bishnupur, Thoubal leh Imphal East district-a mite an ni a, natna dang nei tel an nih thu a tarlang. 

Ningani khan Manipur-ah hian hri kai hmuh thar mi 102 an awm a, an zinga mi 27 chu Central Armed Police Force (CAPF) mi an ni a, civil mi 75 an tel. Civil mi hri kai hmuh tharte hi pawn lama zin chhuahna nei lo, tualchhung aṭanga kai vek niin additional health director Dr K Sasheekumar Mangang chuan a sawi. 

State pumah hri kai hmuh tawh hi 6,609 an tling tawh a, an zingah hian security force mi leh sa 1,629 an tel a ni. Hri kai hmuh tawh zinga 4,774 chu enkawl dam an ni tawh a, enkawl mek 1,803 an la awm.