Nagaland atangin Assam mite an haw lo: CM Gogoi

Nagaland, Dimapur-ah mipuiin pawngsualtua nia rinhlelh, Assam mi an chil hlum avangin Assam mi ṭhenkhatin Nagaland an chhuahsan a, mahse Assam Chief Minister Tarun Gogoi chuan Nagaland aṭangin a huhoa haw an awm loh thu a sawi.

"Mi ṭhenkhatin Nagaland chhuahsanin Assam-ah an haw tih kan hria a, mahse a huhoa Nagaland an chhuahsan kan hre lo. Dimapur-a thilthleng avangin mi ṭhenkhat chu an hlauhthawng a, hei vang hian Nagaland an chhuahsan a ni," a ti.

Assam Chief Minister chuan Nagaland-a Assam mite himna ngaihtuahsak turin Nagaland Chief Minister TR Zeliang lehkha a thawn tawh bawk.

Naga hmeichhia pawngsualtua puh, Assam, Karimganj district mi Sayed Sarif Khan chu March 5 khan Dimapur jail aṭangin mipuiin an hnukchhuak a, kawng an zawhpui pahin an sawisa hlum a ni.

Hetihlai hian Dimapur boruak pawh a ziaawm tawh niin an sawi a, ni thum chhung curfew puan a nih hnuah Pathianni khan thlahdul a ni a, Thawhṭanni kha chuan lekkawh chhunzawm a ni lo.

Dimapur Additional SP Kakheto chuan pawngsualtua puh, Khan thihnaa a mawhphurtua puh an man tawh zat chu Thawhṭanni thleng khan mi 43 an tlin thawh thu a sawi.

ASP Kakheto chuan Code of Criminal Procedure (CrPC ) Section 144 tlawhchhana curfew an puan chu Pathianni zing dar ruk aṭanga chaw hnu dar 12 thleng thlahdul a nih hnuah lekkawh chhunzawm a nih loh thu a sawi bawk a, Khan thihnaa mawhphurtute chu man vek tuma hma an lak thu a sawi bawk.

Dimapur thilthleng vang hian kar kalta Inrinni tlai aṭang khan Nagaland-ah internet leh mobile SMS service pawh block a ni a, Thawhṭanni tlai dar ruk thleng block tura ruahman a ni a, mahse a boruak awmdan azirin block chhunzawm tura rel a ni.

Assam MP te'n

Lok Sabha-ah Dimapur thil­thleng an sawichhuak

Nagaland thilthleng hi Assam MP te chuan Thawhṭanni khan Lok Sabha inkhawmah sawi chhuakin, dan leh thupek lekkawh kawnga Naga­land sorkar hlawh­chhamna a ni, an ti.

Assam Congress MP Gaurav Gogoi chuan Dimapur Central jail veng tura ruat Central force te chuan pawngsualtua puh hi an venghim zo lo a ni, a ti. Nagaland sorkar chu sawiselin, Khan chu a pawikhawihnaah thiam loh chantir a ni lo a, court hmaa rorelsak a phu a ni, tiin Nagaland sorkar chuan pawikhawihtua puh chu thiam loh chantir a nih leh nih loh a puang duh lo a ni, a ti.

Assam Chief Minister fapa, MP Gaurav chuan pawngsualtua puh Khan chu Bangladesh mi a nih loh thu leh Assam mi, India khua leh tui dik tak a nih thu a sawi bawk.

BJP MP Raman Deka chuan a hnam leh pawl anga hnam dangte chung­a chetlakna chu enfiah a nih loh chuan thil ṭha lo zawk a chawk­chhuak thei a ni, a ti.

Assam Assembly-ah Dimapur thilthleng thawm a ring

Congress MLA Siddique Ahmed-a'n Dimapur-a thilthleng chu a hmain a hriat lawk thu leh mipuiin jail-a tang Khan chu hruaichhuah an tum thu chu Chief Minister Tarun Gogoi a hrilh lawk thu a sawi a, MLA Ahmed-a thusawi hi assembly-ah eptu lam chuan sawichhuakin engtin nge Ahmed hian Dimapur thilthleng chu hriatlawk theih, tiin zawhna an siam.

AIUDF MLA Abdur Rahim Khan, AGP MLA Padma Hazarika leh eptu MLA dangte pawhin Congress MLA Ahmed-a thusawi chu sawifiah turin state sorkar an phut thu an tarlang bawk.

MLA Ahmed hian Pa­thian­ni khan tual­chhuang television news channel pakhat-ah Dimapur thil­thleng chu a hriat lawk thu a sawi a, Chief Minister a hrilh lawk thu leh dan leh thupek dinhmun tichhe thei thil a thlen theih thu a sawi.

Hetihlai hian Parliamentary Affairs Minister Rockybul Hussain chuan eptute chu Dimapur thil­thleng aṭanga politics-a hamṭhatna hmuh tumah a puh thung.

Assembly Speaker Pranab Kumar Borah pawhin tlang thu thang behchhana House-a sawi hona neih chu a remtih loh thu a sawi a, MLA Ahmed-a thusawi chu sorkar laipui chhuichian tir a rawt. Ahmed pawhin a thusawi chungchang chu House-ah sawiin, Dimapur-a buaina lian tham a chhuah theih thu chauh Chief Minister a hrilh tiin a sawi leh thung.

Assam PCC president Anjan Dutta chuan Cong­ress MLA Ahmed chu hriattirna pein, ni thum chhunga insawifiah turin a hriattir bawk.