Arunachal assembly-ah vote-on-account an pass

Arunachal Pradesh Chief Minister Nabam Tuki chuan state assembly budget session-ah March 5 khan budget puitling pharh loin, financial year thara thla li chhung hman tur vote-on-account a pharh a, eptu lam chuan sawiselin, Ṭhawhtanni khan House aṭangin an chhuak tau a, mahse vote-on account hi eptute chhuah tauh hnuah voice vote hmanga pass a ni.

Vote-on-account an duh loh lantir nan eptute hi nimina budget session kharnaah an tel lo.

Eptu hruaitu Tamiyo Taga chuan, eng vangin nge Finanace portfolio changtu, CM Tuki-a'n budget puitling pharh lo a, vote-on-account a pharh? tiin a chhan a hriat duh thu a sawi.

Chief Minister Tuki-a'n vote-on-account pharh chhan chu ‘NITI Ayog’ aṭanga fund an hmuh loh vang tia a lo sawi tawh chu Taga chuan rintlak a tih loh thu a sawi a, vote-on-account pharh a nih chhan chhuichian a phut thu a sawi.

"State sorkarin development sum tam tak a tihchingpen avangin hmathlir a nei thei tawh lo a ni,"tiin Taga chuan a sawi bawk.

Chief Minister Tuki chuan eptute puhna chu chhangletin, vote-on -account pharh a nih chhan chu sum inrelbawlna kawngah sorkar laipui aṭanga hriattirna chiang tak dawn an phut vang a ni, a ti.

"Sorkar laipui aṭang­a fund kan hmuh loh avang­in budget puitling pharh theih a ni lo a, state tinte annual plan chinfel nan Planning Commission (NITI Ayog) pawhin meet­ing a ko lo a ni. State sorkar chuan nikum khan sorkar laipui aṭanga fund hmuh beiseiin, kum 2014-15 budget-ah cheng vaibelchhe 4,915 a pass a, mahse sorkar laipui aṭanga fund dawn kan beisei aṭangin vaibelchhe 415 kan hmu kim thei lo a ni. Nikumah Union budget puitling pharh a ni lo a, hei vang hian kumin­ah keini pawhin budget puitling kan rua­hman thei lo a ni," tiin CM chuan a sawi.

Vote-on-account-ah hian plan atan vaibelchhe 371.22 ruahman a ni a, non-plan-ah cheng vaibelchhe 1415.08 rua­hman a ni bawk.

Arunachal-a BJP senior leader Japu Deru pawhin vote-on-account pharh a nih vanga state sorkar a dem thu tarlangin, vote-on-account chu inthlanna neih kum emaw khuarel chhiatna thleng vanga emergency a awm chauhin ruahman theih a ni, a ti.