M'laya Governor-in budget session-ah thuchah a sawi

Meghalaya Governor Keshari Nath Tripathi chuan Thawhṭanni khan state assembly-a budget session ṭan nan thuchah a sawi.

Governor Tripathi chuan House zahawmna leh kalphung te vawnhim a ni zel chu lawmawm a tih thu sawiin, MLA te chu House zahawmna leh kalphung ṭhate chhawm nung zel turin a ngen.

Ram venhimna te, remna leh muanna bak­ah dan leh thupekah te Meghalaya-in hma­chhawp leh hmabak ko tak a neih thu sawiin, state sorkar chuan heng harsatnate hmachhawna, hneh theih turin theihtawp a chhuah mek zel a ni, a ti.

Remna zawnga hel pawlte inbiakna neihpui danah sorkar chuan kal­phung thar a duan chhuah thu sawiin Governor Tripathi chuan remna zawng­a sorkar be duh lote leh pawi a la khawih rengte chu sorkar chakna zawng zawng hmanga beih an nih tur thu a sawi.

Tripathi chuan sorkar nena ṭum eng emaw zat an inbiak hnuah ANVC leh ANVC (B) helte chuan nikum September 24 khan remna thutlung an ziah thu a sawi a, hel pawl hnihte chu tihtawp a nih tawh thu a tarlang bawk.

Meghalaya-a a ruka pemlutte chungchang sawiin Governor chuan sorkarin pemlutte dan chah nan theihtawp chhuahin hma a la tawh a, NGO te ṭanrual puiin hma a la zel dawn a ni, a ti.

Governor Tripathi chuan HNLC leh GNLA helte chu tharum thawhna bansan tura ngenin, remna zawnga sorkar be turin a ngen bawk.