Gauhati HC-in Covid-19 norms zawm lote hrem turin hriattir
Assam state-ah hripui leng mek a la hluar zel avangin, Gauhati High Court chuan hri darh tur venna atana sorkarin kaihhruaina a siam, hmai tuamna hman tur tih leh midang nena inhlata awm tur a tihte zawm lo chu hrem zel turin state sorkar a hriattir.
Ningani khan chief justice Ajai Lamba leh justice Manish Choudhury awmna division bench chuan Tanmay Jyoti Mahanta petition thehluh an ngaihtuah hnuah he thupek hi an tichhuak a ni.
Mahanta chuan a petition thehluhah, Assam sorkarin hri darh tur venna atana kaihhruaina a tihchhuah hrang hrang, a bikin face mask leh social distancing hmang tura a tih chu mipuiten an ngai pawimawh lo hle niin a sawi a, hei vang hian an state-ah pawh hri kai pung chakin nuai an chuang tawh a ni, a ti. Court hnenah hian sorkar thuneitute hnenah dan hi khauh taka kengkawh tura nawr turin a ngen a, dan hi zawm ṭhat a nih loh chuan hri leng chuan zual lam a pan zel dawn thu a sawi.
Court chuan petition thehluttu thusawi hi a ṭawmpui thu sawiin, sorkarin thupek hrang hrang tichhuak mah se dan zawm lote chungah hremna lekkawh tak tak a ni lo niin a sawi.