Arunachal : ILP thuam chak turin ṭan la

Arunachal Pradesh chhunga Inner Line Permit (ILP) hman mek thuam chak a nih dan tur sawi hoin Thawhṭanni khan chief minister Pema Khandu, sorkar hotute leh All Arunachal Pradesh Students Union (AAPSU) te an inkawm. Khandu chuan ILP thuam chak turin state sorkarin ṭan a la tih a sawi.

Chief Minister chuan dan loa state chhung lutte leh pawn lam mi hun rei tak chhung an zinga khawsate chu an hnam chindan phung leh mipui cheng zat tidanglam thei thil a ni tih sawiin heng laka venghim tur hian ILP chu a pawimawh a ni, a ti. Arunachal mipuite him nan ILP chu thuam chak zel a ni dawn tih a sawi bawk.

Chief Ministers Office (CMO) pawhin thuchhuah siamin, state sorkar chuan Arunachal leilung fate himna a ngai pawimawh a, an dikna chanvo humhim turin hma a la zel dawn tih a tarlang.

Pema Khandu chuan sorkarin ILP thuam chak turin hma a la ṭan tawh a, hemi a hlawhtlin theih nan hian NGO puihna an mamawh dawn tih a sawi bawk. ILP ṭangkai taka hman a nih theih nan AAPSU chu ṭanrualpuiah a sawm nghal a ni.

AAPSU president Dozi Tana Tara chuan an zirchianna report leh ILP thuam chak tura rawtna an neihte chu CM hnenah a thehlut. Zirlai pawl hian ILP hman dan uluk zawka thlithlai leh phalna pek chhuah kawngah fimkhur a ngai tih an tarlang a, Assam ramri depa awm district 12-ah ṭan lak a ngai leh zual a ni, an ti.

AAPSU chuan state sorkar chu e-ILP system titawp turin a ngen a, Bangladesh buaina vanga raltlan rawn lutte chuan Arunachal an rawn pan a hlauhawm tih an sawi. Electronic-ILP diltute chik taka endik an har avangin hman sual theih a nihna a sang a, heivang hian sorkar chuan titawp se an duh a ni.