Manipur : Zou CSO-in Indo-Myanmar ramri hung mek tihtawp duh

Zou Civil Society Organizations (CSOs) chuan India leh Myanmar ramri hung mek dodalna an lantir. Zou CSOs hian nimin khan Churachandpur District-a Behiang khua an tlawh a, ramri hung hna thawh mek chu an duh lo a ni tih thuneitute an hriattir a, tawpsan turin an ngen a ni.

Zou CSOs aiawhte hian Border Roads Task Force (BRTF), Assam Rifles leh Behiang khawtlang hruaitute an kawm a, ramri hungna tura project chu langtlang taka kalpui a nih loh thu an sawi. Ramri hung chu tualṭo hnamte dikna chanvo palzutna a nih tih an sawi bawk.

India leh Myanmar ramri hung chuan hmasang aṭanga an ram, an hnam chanchin leh chindan phung atana pawimawhte chu a tichhia nia sawiin hnathawh mek chu titawp turin thuneitute chu an ngen. Ramri hung hna an thawh leh hmain khawtlang mipuite leh Behiang Area Chief Association rawn hmasa turin an duh tih an sawi bawk.

Ramari hung chu kum 2014-a ṭan, 'Act East Policy' nen a inkalh a ni tih Zou CSOs chuan an tarlang a, khawtlang mipuite hmasawnna dal theitu a ni tih an sawi bawk. Act East Policy a hlawhtling theih nan zalen taka ramria inkalpawh theih a pawimawh a ni, an ti.

Arunachal Pradesh, Nagaland leh Mizoram-ahte ramri hung hna chu sorkar laipui inrawlh lo mah se tihkhawtlai a ni tih an sawi a, Manipur chief minister N Biren Singh leh Meitei kalfawr pawlten ramri hung hi ramri hrula chengte hmasawnna dal nana an ruahmanna pakhat nia an ngaih thu an tarlang bawk.

Zou CSOs chuan sorkar laipui leh state sorkar chu ramri hung hna thawh mek chu titawp nghal turin an ngen a, an ngenna an ngai pawimawh loa hna thawh chhunzawm zel a nih chuan buaina nasa zawk a chhuak thei tih an sawi.