Meghalaya : Sorkar hna laka interview tihtawp turin nawr

Meghalaya-a political party pakhat, Khun Hynniewtrep National Awakening Movement (KHNAM) chuan sorkar hna laka personal interview neih ṭhin tihtawp a nih theih nan August 19, Thawhṭanni khan nawrh an huaihawt. Sorkar hna laka induhsakna awm ṭhin tihtawp a nih theih nan interview chu tihtawp a ngai a ni, an ti.

KHNAM hian Malki ground-ah nawrh hi an huaihawt a, president Thomas Passah chuan sorkarin Group B,C leh D hna a laknaah induhsakna hmanga tling an awm loh nan personal interview neih ṭhin chu titawp se an duh tih a sawi. Sorkar hna lak chu langtlang leh dik taka kalpui an duh tih an tarlang.

Thomas Passah chuan exam-naa a tiṭhate an tlin theih nan kum 2016 hnu lam aṭangin sorkar laipui leh India ram chhunga state 23-te chuan personal interview an titawp tawh tih a sawi. Ṭhalai hna zawng mekte angkhata en an nih a, dik taka hna lak a nih theih nan interview tihtawp chu a ngai a ni, Passah chuan a ti.

Meghalaya sorkar chuan an ngenna ngai pawimawh se an duh tih sawiin, hna neih theih nana hmelhriat neih ṭhat tumna um bo nan personal interview chu titawp ngam se an duh thu an tarlang. Sorkar hna laknaa interview tihtawp a nih chuan Meghalaya mipuite chu a chhawr ber tur an ni tih KHNAM president chuan a sawi bawk.