Tripura : Ruah surin chhiatna a thlenah mi 7 an thi

Tripura-ah Thawhṭanni aṭang khan ruah sur nasa takin a thlen tuilian leh leimin avangin mi pasarihin nunna chanin mi pahnih chin hriat lohin an bo mek. State chhunga khuarel chhiatna thleng avang hian mi 5,600 chuang hmun him lamah sawn chhuah an ni bawk.

Ruah tla a tam vang hian lui - Gomati, Muhuri, Haora leh Khowai chim chin chuan hlauhawm chin a pel tawh a, tuilian hi a nasat phah a ni. Revenue department secretary, Brijesh Pandey chuan khuarel chhiatna thleng vanga nunna chan hi South district-ah panga niin Khowai leh Gomati district-ah pakhat ve ve an awm tih a tarlang a, heng district pahnihah hian chin hriat loh a bo an awm tih a sawi bawk.

Tripura chief minister Manik Saha chuan New Delhi-a a zinna aṭangin state chhunga chhiatna thleng a ngaihven reng a, Thawhlehni khan New Delhi aṭang hian letin tuilian thleng chungchanga hma lak dan tur thuneitute nen sawi ho nghal a ni. Saha chuan chhawmdawl hna thawh chu muangchang loa nei turin a chah.

Chief Minister Saha hian tuilian vanga harsatna an tawh mek chungchang sawipuiin nimin zing khan union home minister Amit Shah nen an inbia a, an state a chhiatna thleng leh hma an lak dante a hrilh a ni. Saha hian chhanchhuah hna thawk turin National Disaster Response Force (NDRF) tam zawk tir lut turin a ngen. Home minister chuan ṭanpui an ngaihna laiah an pui zel dawn tih a lo hrilh a ni.

Kum 30 chhunga ruah tla a tam ber ṭum : Debbarma

Tripura ṭualṭo party, TIPRA Motha hotu Pradyot Debbarma chuan kum 30 liam ta chhunga an state-a ruah sur a tam ber ṭum a ni tih sawiin an dinhmun chu a khirh takzet tih a sawi.

Debbarma chuan khaw tam takin tuilian an tuar a, a tuartu mipuite chuan riah buk sak chawpah tawm hulna an zawng tih a sawi. An harsatna tuar mek sukiang tura chak taka hma la turin sorkar laipui, state sorkar leh Tripura Tribal Areas Autonomous District Council (TTAADC) hotute chu a ngen.

TIPRA Motha hotupa hian Tripura mai bakah an chhehvela ram dangte chuan tuilian nghawng hi an tuar ve thei tih sawiin, an state chhunga tui khuah (Dam) chhia chuan Bangladesh-ah harsatna a thlen thei niin a sawi bawk.

Chhawmdawl hna thawh dan

District thuneitute chuan chhiatna tuarte chen lailawkna turin chhawmdawlna-in 183 an siam a, thuneitute chuan an dinhmun an ngaichang reng bawk. Chhanchhuah hna hi State Disaster Response Force (SDRF), NDRF, Civil Defence Volunteers, Aapda Mitra Volunteers, Fire and Emergency Services, Forest, TSECL, PWD (WR), PWD (R&B), Agriculture leh line department hrang hrangten an thawk reng a ni.

Khuarel chhiatna thleng laka chhan chhuah hna thawk tura mithiam bikte chuan nimin khan Tripura hi an thleng a, hna an ṭan nghal a ni. Hemi bakah hian Assam Rifles chuan Unakoti leh Gomati district-ah chhan chhuah hna an thawk ve bawk. Zirlai naupangte him zawk nan Tripura chhunga school zawng zawng tan nimin leh vawiin hian chawlh puan a ni a, College chu nimin khan an chawl ve bawk.