Manipur : Kangpokpi-ah AR post tihtawp duh lohna lantir

Manipur aṭangin a tahtawlin Assam Rifles (AR) sawn chhuah zel niin hemi kawnga hmalakna pakhat atan 22 Assam Rifles post, Banglabung Gelnal khua a mi chu tihtawp a ni. AR post tihtawp duh lohna lantir nan Twilang, Kangpokpi-ah Kuki-Zo hnamte chuan nimin khan nawrh an huaihawt.

Kuki Inpi Twilang Lhang kaihhruaina hnuaiah nawrh hi huaihawt niin, helai huam chhung khaw hrang hrang aṭangin hmeichhia tel an ṭhahnem hle. AR post tihtawp vangin an himna a derthawng thei an ti a, hemi hian a ti hlauthawng hle niin an sawi. AR post chu titawp lo turin an ngen a ni.

Kuki-Zo hnamte chuan 22 AR post commander hnenah memorandum thehlutin, Commanding Officer hnenah hlan chhawng leh turin an ngen. An memorandum-ah hian thutlukna siam tawh chu ngaihtuah ṭhat leh ni se an duh tih an tarlang a, AR an awm vanga venhimna ṭha nei an nih bakah hemi huamchhunga buaina chhuak lo a ni, an ti.

Assam Rifles chuan ṭan lam nei loin buaina a sosan lai pawh khan Meitei leh Kuki-Zo hnamte an mite zinga him dam taka hruai thlengtu an ni tiin AR chu an fak bawk. Remna leh muanna a awm theih nan AR awm chhunzawm zel chu a pawimawh tih an tarlang.

Twilang-a nawrh huaihawtte hian Meitei pawl, a bikin Coordinating Committee on Manipur Integrity (COCOMI) in Central Reserve Police Force (CRPF) te AR thlak tura an nawrna chu ṭha an ti lo a, COCOMI thil ngiat a hlawhtlin chuan buaina thar chhuakin boruak dai ṭan mek chu a chhe lam zawngin a kal thei a ni, an ti.

Kuki-Zo hnam chenna hmunah Assam Rifles awm tir zel an duh a, an huamchhunga remna an neih theih nan thawhpui an inpeih reng tih an tarlang bawk. AR sawn an nih chuan sorkar laipui leh state sorkar an rinna chu a chhiat phah thei niin an sawi bawk.