Assam : Khau puangin loneitute buh tichhia

Assam-a Gohpur leh a chhehvel chuan khau puang vangin harsatna an tawk. Khau hian loneitute buh tih chhiatsakin loneitute chu an mangang hle a, an harsatna tawh mek sukiang tur hian hmalak a la ni lo niin an sawi.

Khau puang vang hian Gohpur region-ah hian thlai chinna hmun bigha tam tak tih chhiat a ni tawh a, Jaranigaon leh Dubia-a thlai chinna hmunte chu a tuar na zual nia tarlan a ni.

Gohpur hmuna loneitu pakhat chuan an lo chu a chhiat tawh thu sawiin buh hring awmna turte chu an ei ro vek tawh a, "Hal ni ila a kang ṭha duh viau ang" tiin a sawi. An harsatna sukiang turin sorkar chu hma la thuai turin a ngen.

Gohpur leh a chhevel hian tuilian tuarin he an harsatna aṭanga an tal chhuah hnuah loneitute chuan buh an phun ṭan a, mahse khau puang vangin an buai zui leh ta a ni. Assam agriculture department lam aṭangin Gohpur leh a chhehvel tlawhtu an la awm lo a, khau venna tur hlo an la pe chhuak lo bawk. Thuneitute lam aṭanga ngaihsakna ṭha an dawn loh avangin loneitute hian an lungawi loh thu an sawi a ni.