CM Gogoi-a'n Assam budget 2015-16 a pharh

Finance portfolio chang­tu, Assam Chief Minister Tarun Gogoi chuan Thawhlehni khan state budget 2015-16 a pharh.

Budget estimate-ah hian kum 2015-16 chhunga revenue aṭanga sum lakluh tur chu cheng vaibelchhe 2,50,292.25 beisei a ni a, expenditure-ah cheng vaibelchhe 2,48,682.47 ruahman a ni. Opening deficit-a cheng vaibelchhe 1875.10 awmsa nen kum tawpa deficit hi cheng vaibelchhe 265.32 tura chhut a ni.

Hmarchhak state zing­ah kumin hian Assam chauh hi budget puitling pharh thei a ni. Chief Minister Gogoi chuan kumin chhung atan chhiah lak belh tur a puang lo a, mahse motor vehicle tax, motor hlui registration tax, mines & mineral tax, zu chhiah, zuk leh hmuam chhiah, thingpui aṭanga VAT lak te chu tihpun a tum a, tlereuh leh hmeichhe thil siam aṭanga VAT lakte tihtlem tum a ni thung.

Chief Minister chuan chhiah lak dan kalphung siamṭhat aṭangin cheng vaibelchhe 350 revenue an hmuhbelh theih a beisei thu a sawi. Mipuite hnena aṭanga chhiah lak belh a rawt loh thu a sawi bawk a, motor hlui registration tihna man kum 2011 aṭanga la tihpun loh chu tihpun a ni a, hemi aṭang hian Gogoi chuan vaibelchhe 100 revenue a luh a beisei thu a sawi bawk.

Zu chhiah aṭangin vaibelchhe 600 hmuhbelh an beisei thu Gogoi chuan a sawi bawk a, hemi atan hian licence fee leh application fee te tihpun tum a ni. Hetihlai hian foreign zu, India-a siam (Indian Made Foreign Liqour) thawnchhuah man case khata Rs 50 lak chu Rs 5-ah tihhniam tum a ni.

Gogoi chuan hmei­chhia, naupangte bakah hnam tlem leh hnuai­hnung te chhawmdawl nan scheme thar a puang bawk.

Brahmaputra leh lui tuite humhalh leh sawngbawl nan Brahmaputra and Barak Valley Authority din a nih tur thu a sawi a, state chhunga tui hman ṭangkai dan ngaihtuahtu atan State Water Mission kalpui a nih tur thu leh tuilian lam ngaihventu atan State level Water Management Authority din a nih dawn tih a sawi.

Assam Chief Minister chuan environment humhalhna leh leilung hausakna inrenchem taka hman a nih theih nan a buaipuitu atan State Environment Management Authority din a nih tur thu a puang bawk.

Assam land and revenue kalphung tihchang­tlunna atan Assam Land and Revenue Service siam a nih tur thu a puang bawk.

Gogoi chuan assem­bly bial tina loneitu sang­khat thlanchhuah te hnenah Rs 5,000 ṭheuh tanpuina pek an nih tur thu a sawi bawk a, loneitute hnenah tractor 1,890 leh power tiller 5,000 chu 75% subsidy-a pek a tum thu a sawi.

Block headquarters zawng zawng tuamchhuak vekin agriculture service centre 219 hawn a nih tur thu leh loneitu ṭha chawimawi nan Moinul Haque Chou­dhury (L) hming chawiin award buatsaih a nih tur thu a sawi bawk.

Motor kawngpuia inkalpawhna tihchangtlun nan assembly bial tinah kilometres 500-a thui 'all weather road' siam a nih tur thu a sawi bawk a, Road Safety Authority din a nih tur thu a sawi bakah driving training school panga leh road accident trauma centre hawn a nih tur thu a sawi.

Assam Chief Minister Gogoi chuan Nalbari, Nagaon leh Udalguri district-ah engineering college pathum hawn a nih tur thu a sawi bawk a, Guwahati-a zirlaite tan hostel campus din a nih tur thu a sawi bawk.

Health tihchangtlunna a tumnaah Gogoi chuan Assam-a medical college awm zawng zawnga cancer wing-ah khûm 50 ṭheuh dahbelh a nih tur thu a sawi bawk a, BPL zirlaite kum 18 hnuai lamte tan a thlawna damdawi inenkawlna scheme kalpui a nih tur thu leh thingtlang lamah mobile cancer detection laboratory siam a nih tur thu a sawi.

Assam Chief Minister Gogoi chuan hnam tlem zawk- Garos, Kumars, Modahis, Suts, Hajongs leh Chowdangs te tan development council siam a rawt bawk a, Scheduled Caste Development Council leh Minority Development Council din a rawt bawk.