Arunachal-in power aṭangin vbc 445 lalut dawn: CM Tuki

Arunachal Pradesh Chief Minister Nabam Tuki chuan hydropower project pathum kalpui mek chu hman theih a nih chuan Arunachal-in a thlawna power 12% a dawn tur aṭangin kum khatah cheng vaibelchhe 445 an lakluh theih tur thu a sawi.

State assembly ṭhutkhawma Independent MLA Paknga Bage-a'n a zawhna chu Tuki chuan chhangin North East Electrical Power Corporation (NEEPCO)-in 110 MW Pare project leh 600 MW Kameng project an kalpui mek chu kumin kumtawp emaw nakkum kum tirah hman theiha peihfel a nih tur thu a sawi a, 2000 MW Lower Subansiri hydro electric project hnathawh chawlhsan mek pawh thawh chhunzawm thuai a beisei thu a sawi bawk.

Tuki chuan power project pathum aṭang hian 12% ṭheuh a thlawnin power an dawn tur thu a sawi a, Pare project aṭang hian vaibelchhe 17, Kameng project aṭangin vaibelchhe 95 leh Lower Subansiri pro­ject aṭangin vaibelchhe 333 kum khatah an lakluh theih thu a sawi.

Arunachal Pradesh chuan power MW 60,000 a siamchhuah theihna a neih thu sawiin, India ram power mamawh 40% chu Arunachal-a siamchhuah theih a ni, a ti a, power chu siamchhuah a nih chuan sorkar laipui ṭanpuina ring loin an intodelh theih thu Tuki chuan a sawi bawk.

Thawhlehnia Aruna­chal assembly inkhawm­ah hian Global University Arunachal Pradesh (Amend­ment) Bill, 2015 chu voice vote hmanga pass a ni bawk.