Jail tang te himna ngaihtuahsak turin HC-in Nagaland a hriattir
Gauhati High Court division bench chuan March 5-a Dimapur thilthleng kaihhnawihah Thawhlehni khan Nagaland hmun hrang hranga jail tang te venhimna ṭha ngaihtuahsak turin sorkar laipui leh Nagaland sorkar a hriattir.
Nagaland-a jail tangte himna chungchangah Rajib Kalita chuan Thawhṭanni khan Public Interest Litigation (PIL) a thehlut a, HC chuan PIL hi ngaihtuahin Nagaland sorkar leh sorkar laipui hnenah hriattirna a pe a ni.
Petition thehluttu Kalita aiawhin inlan, senior advocate Bhaskar Dev Konwar chuan Nagaland hmun hran hrana jail tangte venhimna chuan an chhungte a timangang a ni, a ti.
Gauhati HC hian sorkar laipui pawh jail tangte himna chungchangah hian report thehlut turin a hriattir bawk.
March 5 khan Dimapur-a pawngsual duh lohna lantira kawngzawhte'n pawngsualtua puh, Central jail-a tang chu jail chhungah luhkhungin an hruai chhuak a, kawng an zawhpui pahin an sawisa zui bawk a, a hnuah a hliam tuar loin a boral zui a ni.
Jail tangte himna chungchanga petitioner thehluttu hian Dimapur-a thilthleng chu HC kaihhruaina hnuaiah CBI chhuitir a phut bawk.
Hetihlai hian Nagaland sorkar chuan March 5-a kawng zawhnaa police te leh mipuite innawrnaa police te kuta thi chhungte hnenah zângnadawmna Rs nuai khat pek an nih tur thu a puang a, hliam tuarte hnenah Rs 50,000 ṭheuh pek an nih tur thu a puang bawk.