GNLA helte kutah police 4 an thi

Garo National Liberation Army (GNLA) hel pawlte chuan Thawhlehni khan South Garo Hills district khawpui, Baghmara aṭanga kilometre 16-a hla Panda reserve forest area-ah police an lambun a, police pali an kaphlum.

Police team te hi Rongara aṭangin Baghmara panin gypsy-in an kal a, zing dar 10:30 vel­ah GNLA helte hian lo lambunin, Sub-inspector Sombatsing K Sangma leh constable pathum- Lenin Ch Marak, Tangseng Arengh leh Hemingstone Marak te chu a hmunah an kaphlum a ni.

GNLA helte kutah hian police pahnihin hliam an tuar bawk a, 3rd Meghalaya Police Battalion-a constable- Arpon Marak leh Baiti Sangma te an ni.

Hel ho hian police te AK silai pakhat, INSAS silai pahnih leh 9 mm pistol pakhat an laksak bawk.

Meghalaya DGP Rajiv Mehta chuan GNLA helte pawikhawihna hmun chu a tlawh nghal a, helte hian IED bomb an kam thu leh a puah loh thu a sawi.

State sorkar chuan police thi chhungte hnenah zângnadawmna cheng nuai 7.5 ṭheuh pek an nih tur thu a puang.