Meghalaya-in state quota-a MBBS zir Sorkar hnuaia thawk duh lote sum chawi tir

Meghalaya sorkar chuan an state-a doctor indaih lohna avangin state quota-a MBBS zir, sorkara bond ziakte chu duty turin a ko a, thawk duh lote chu bond an sign angin an zirna senso atana sum lo hman tawhte chawi turin a hriattir. 

Director of Health Services, Dr Aman Warr chuan hriattirna pek an nih hnuah doctor 10 chu sorkar hnuaia thawk turin an in report tawh a, hetih lai hian doctor pahnih chuan sum chawi zawk an thlang tih a sawi. An sum chawi tur hi Rs nuai 10 - Rs nuai 25 inkar vel a ni. 

Sorkar chuan heng doctor-te hi August 31 thleng hun a pek thu sawiin, hemi chhunga an in report duh loh a nih chuan Superintendent of Police hnenah hriattirin, anni hian a ṭul angin action an la zui ang. State quota-a MBBS zirte sorkarin bond a ziahpuinaa sum tarlan hi a hma chuan Rs nuai 10 a ni a, mahse kum 2018 khan sorkar chuan Rs nuai 25-ah tipungin, kum 2018-ah Rs nuai 30-ah tihpun leh a ni. Dr Ward chuan kum 2018 leh a hnu lama bond agreement ziahpuite chu an la zir mek tih a sawi. 

Doctor tam tak, state quota-a zir chhuakte chuan sorkar hnuaia thawk chhunzawm lo a, pawisa chawi hi an duh zawk a, kum hnih chhungin pawisa chawi duh zawkte hnen aṭanga sum hmuh hi cheng vaibelchhe thum a tling a ni. Meghalaya-ah hian sorkar hospital, Community Health Centres (CHCs) leh Public Health Centres (PHCs)-a thawk mek doctor 800 chuang an awm a, hripui leng vang leh hri kai an pun belh zel avangin doctor hi an indaih lo hle.