Manipur NPP President hnawtchhuak

National People’s Party (NPP) chuan Manipur unit president atana thlan thar, Thangminlien Kipgen chu thlan tlin a nih danah an party constitution bawhchhiaa puhin an party aṭangin an hnawtchhuak. 

NPP national president, Megha­laya chief minister Conrad K.Sangma chuan video message hmangin Kigpgen hnawhchhuah a nih thu hi a puang. Sangma chuan, "Party kalphung kalhin Thangminlien Kipgen hian inthlan neih tur hi a puang a ni," a ti. Hei vang hian show-cause notice pawh pek a ni a, inthlan kaltlang pui lo tura tih a ni chungin a kalpui lui a ni, a ti. Party hruaitu thlannaah hian Kigpen hi a term thumna atan uncontest-in a tling a ni. 

Sangma chuan Kipgen leh a thurualpui ten inthlan an buatsaih dan chu dan kalh a ni tiin, hei vang hian party aṭanga hnawtchhuah a nih thu a sawi. Manipur unit president lailawk atan tribal affairs minis­ter ni lai, N Kayisii chu ruat nghal a nih thu a sawi bawk. Party officer bearer pawh thlan thuai a ni ang, tih a sawi bawk. Hetih lai hian Kigpen chuan an party kalphungah interim president a awm thei lo tih sawiin, lehkha-a hriattirna hmang ringawta elected president ban theihna pawh awm lo tih a sawi.