Manipur : Kuki-Zo MLA-ten CM hrem turin an ngen
Manipur Legislative Assembly-a Kuki-Zo legislator 10 te chuan audio clip sawi hlawh tak, 'Manipur Tapes' tia hriatah chief minister N Biren Singh chuan chi leh chi inkara buaina chhuaka a inrawlh dan leh, a hmalak dan a sawite chu a dik a nih chuan dan anga a chunga hma lak ngei ni se an duh tih an sawi.
'Manipur Tapes' an tihah hian Biren Singh chuan state chhunga chi leh chi inkara buaina chhuaka a inrawlh dante chu chhuang takin a sawi a, hei hian sorkar puihnain Kuki-Zo hnam thenfai tumna kalpui a ni tih a tilang tiin MLA-te chuan an sawi. Tape-a thusawitu hi Biren Singh ngei nia an hriat thu leh, a aw pek dan aṭangin Meitei kalfawr pawlte hnena thuchah a sawi lai nia a lan thu an sawi bawk.
Kuki-Zo MLA-te hian thuchhuah siamin, tape-ah chuan civil mite beih nana bomb a hman avanga union home minister-in a zilh thu leh home minister thu ngai pawimawh loa police-te bomb hmang chhunzawm tura thu a pek thu Singh chuan a sawi tih an tarlang. Manipur CM hian ralthuam dahkhawmna hmun aṭanga ralthuam ruk chhuah thubuaiah tumah an la man lo tih a sawi bawk.
Kuki-Zo legislator-te chuan a chunga tarlan bakah tape leaked-ah hian Biren Singh chuan tualchhung buaina chhuak leh a hnu lama thil thlenga thiam lohna a neih tam tak a sawi tih tarlangin Justice Lamba kaihhruai, Judicial Commission-ah 'Manipur Tapes' hi thehluh a ni tih an sawi bawk. MLA-te hian rorelna hran siamsak an ngiat mek hlawhtlin theih nan sorkar laipui chu chak taka hma la turin an ngen a, Union Territory- Legislature nei tel chu pek ni thuai se an duh a ni. Hei hi remna tluantling a awm theihna kawng awm chhun a ni tih an tarlang bawk.
Manipur sorkar chuan audio tape leaked chungchangah hian thuchhuah an siam ve bawk. Tape chu tum nei rana siam danglam a ni tiin Manipur-in remna kawng a zawh mek tihbuai tumna mai a ni, an ti. Manipur sorkar hnuaia Directorate of Information and Public Relations chuan mipuite tan thuchhuah siamin social media-a thil sawi nazawng awih lo turin a chah. Hei bakah dawt leh thuthang dik lo thehdarh lo turin an hriattir bawk.