Meghalaya : Khasi-Jaintia Hills-a bomb tihpuah tumtu mi pathum man

Meghalaya police-te chuan dan pawna hnawl, Hynniewtrep National Liberation Council (HNLC) mi leh sa pathumte chu Khasi-Janitia Hills huam chhunga Improvised Explosive Device (IED) tihpuah an tum avangin an man.

HNLC helpawl mi pathumte chu - Equest Langsiang (31), Deiborlangki Sariang (31), leh Markhlan Biam (34) nia tarlan an ni. Langsian hi Nongpoh, Ri-Bhoi district aṭanga man niin Sariang (Nartiang, West Jaintia Hills) leh Biam (Laskein, West Jaintia Hills district) ahte man an ni bawk.

Ri-Bhoi Superintendent of Police, Jagpal Singh chuan IED tihpuah tumin Langsiang leh a ṭhiante chuan hma an la tiin thu an dawng a, police-te chuan an thudawn bawhzuiin Langsiang chu Bethany damdawi-in bul kawngpuiah manin a phone an mansak aṭangin bomb tihpuah an tum ngei tih finfiahna an hmu chhuak tih a sawi.

Meghalaya police-ten thu an zawhfiah hnuah Langsiang hian IED tihpuah an tum bakah HNLC mi leh sa a ni tiin a inpuang a ni. Hemi hnu hian a ṭhiante- Sariang leh Biam chu police hian zawng nghalin an man zui leh ta a ni.

Ri-Bhoi SP, Singh hian helpawl pathum hian August 14 leh 15, 2024 khan IED tihpuah an lo tum tawh tiin an inpuang tih a sawi bawk. Bangladesh-a awm, HNLC hotupa thupek zawm tih an tarlang bawk. HNLC helpawlte lakah hian Nongpoh police station-ah thubuai ziah luh a ni.