Nagaland : NFSA hnuaia hamṭhatna dawng tur 70% tling

Nagaland sorkar chuan National Food Security Act (NFSA), 2013 hnuaia hamṭhatna dawng thei tur chu an state mipui 70.95% an tling tih an tarlang.

Nagaland sorkar hian Nilaini, August 21 khan thuchhuah siamin priority household (PHH) scheme hnuaia hamṭhatna dawng thei turte chu chhungkaw 2,37,434 an ni a, Antyodaya Anna Yojana (AAY) hnuaiah chhungkaw 47,500 an awm bawk. Nagaland-ah hian fair price shops 1,852 a awm a- khawpuiah 459 leh thingtlangah 1,342 a ni. PHH leh AAY ration card neite tan December 2028 thleng a thlawnin buhfai a lak theih dawn a ni.

NFSA inkaihhruaina angin kum khata cheng nuai 2.5 chung lam la lut, AAY leh PHH scheme-in a huam lohte tan general household (GHH) ration card pek chhuah niin tide-over policy hmangin an buhfai lak tur ruahman a ni, an ti bawk. GHH ration card neite data hi digitalised a ni dawn a, langtlang leh dik tak a ration sem kalpui a nih theih nan department website-ah dah luh a ni dawn tih an tarlang bawk.