Dimapur thil thleng media te'n report dik lo : Chief Minister Zeliang

Kar kalta Ningani, March 5-a pawngsuala puh avanga mipuiin an chilhlum, Syed Farid Khan-a'n Naga hmeichhia kha a pawngsual lo tiin Nagaland sorkar report-in a tarlan thu national media te'n an tarlang a, hemi chungchangah hian Nagaland Chief Minister TR Zeliang chuan sorkarin Union Home Ministry-a report a thehluh chu media lamin an report dik lo a ni, a ti.

Nagaland sorkarin Ministry of Home Affairs (MHA)-a report a thehluh national media te'n an tarlanah hian Khan leh Naga hmeichhe pakhat hian an pahnih remtihnain mipat hmeichhiatna ṭum hnih an hmang ngei tih a tarlang a, mipat hmeichhiatna an hman zawhah Khan hian Rs 5,000 a pe tiin a tarlang bawk.

National media te'n Nagaland sorkar report an tarlanah hian February 24-a police hmaa Khan-a inpuanna chauh tarlan a ni a, pawngsual tawktua sawi, Naga hmeichhia inpuanna thu erawh a lang lo.

Khan-a chuan police te hmaa a inpuannaah hmeichhia hian ama duhthu ngeiin a pan tih a hrilh a, mipat hmeichhiatna an hman hnuah hmeichhia hian sum tam zawk a phut thu leh a pek duh loh avangin a lakah FIR a thehluh thu a sawi.

"Khan-a inpuanna Nagaland sorkar report-in a tarlan aṭangin pawngsual a ni lo tiin Union Home Ministry official chuan a sawi," tiin national media report te chuan an tarlang.

Pawngsualtua puh Khan hi February 24 khan man a nih hnuah Dimapur jail-ah dahluh a ni a, March 5 khan pawngsual duh loh avanga lungawi lo, kawngzawhte chuan jail aṭanga hnukchhuakin kawng an zawhpuinaah an sawisa hlum a ni.

Hetihlai hian Nagaland Chief Minister TR Zeliang chuan Dimapur-a thilthleng chungchangah thudik tawk lo internet leh social media kaltlanga nasa taka thehdarh a ni chu vanduaithlak a tih thu a sawi a, national media te'n MHA-a Nagaland sorkar report thehluh chungchang an chhuah hnuah report chu an ennawn leh thu a sawi a, pawngsual a ni lo tih report-a an tarlan a hmuh loh thu a sawi.

Chief Minister Zeliang chuan pawngsuala sawi chungchang chu special investigation team (SIT)-in a chhuichian mek thu a sawi a, court-ah report an theh­luh thuai dawn a ni, a ti. Court chu pawngsual a nih leh nih loh finfiahtu tur a ni, a ti.

Nagaland sorkar chuan pawngsualtua puh, Khan-a sawisak hlum a nih chungchang chu judicial inquiry neih mek a ni, a ti a, ni 45 chhunga report thehlut tura beisei a nih thu a sawi bawk.

Nagaland sorkar chuan media te'n thu dik tawk lo an la theh­darh a nih chuan inpuh hming­chhiat tumna thubuai siam­sak an tum thu Chief Minister Zeliang chuan a sawi bawk.

MHA-a Nagaland sorkar report thehluh chungchang tarlangtu chu chhui a nih tur thu a sawi bawk.