Tripura power project atan WB-in sum thehchhuak dawn

Tripura power project tihchangtlun nan World Bank-in cheng vaibel­chhe 1,376 a tumsak dawn.

World Bank suma project kalpui tur hi Power Grid Corporation of India Ltd (PGCIL)-in a thawk ang.

Tripura power department official chuan project kalpui tur chung­changah vawiin hian PGCIL, World Bank, Central Electricity Authority, Tripura State Electricity Corporation leh Tripura power department senior official te'n meeting an neih tur thu a sawi.

Meeting-ah hian Tripura Chief Minister Manik Sarkar leh state Power Minister Manik Dey te pawh tel tura beisei an ni.

Power department official chuan cheng vaibelchhe 1,376 hu Tripura power project kalpui tur chu cheng vaibelchhe 8,150 hu, Assam, Meghalaya, Mizoram, Manipur, Nagaland leh Tripura tana 'North Eastern Region Power System Improvement Project' hnuai a mi a ni tih a sawi a, financial year thar (2015-16) aṭanga kalpui ṭan a nih tur thu a sawi bawk.

World Bank hian Union Power Ministry nen inrawnin Tripura project hi a pawmpui tawh a, hmarchhak state danga project atan inbiakna neih mek a ni.

World Bank chuan hmarchhak bial tana rua­hman, North Eastern Region Power System Improvement Project kalpuina atan cheng vaibelchhe 8,150 a tum dawn a, ṭhenkhat chu loan anga pek a ni ang, tiin Tripura official chuan a sawi a, project hnuaiah hian power transmission lines, transmission sub-stations leh power semdarhna lam infrastructure din a ni ang, a ti.