M'laya sorkarin police thite tan special pension siam dawn
Meghalaya sorkar chuan Thawhlehnia South Garo Hills district khawpui, Baghmara bula Garo National Liberation Army (GNLA) helte lambunaa thi police pali te chu special family-pension siamsak an nih tur thu a puang.
State Home Miniser Roshan Warjri chuan he thu hi Nilaini khan state assembly session-ah sawiin, pawikhawihtute chu dan anga rorelsak a nih tur thu a sawi a, zawnchhuah ngei an nih tur thu a sawi bawk.
Police thi te'n an thla hlawh an lak hnuhnung ber zat ṭheuhin state sorkarin mitthi chhungte tan special family-pension a siam tur thu a sawi.
Hetihlai hian eptu hruaitu, Donkupar Roy chuan police thi chhungte chu insurance cheng vaibelchhe hnih aia tlem lo siamsak turin state sorkar hnenah a ngensak.
"Kan tawrhpui thu kan sawi ringawt a tawk lo a, police thite chhungkaw hmalam hun pawh kan ngaihtuahsak a ngai a ni," tiin Roy chuan a sawi.
State sorkarin zângnadawmna cheng nuai 7.5 pek an nih tur thu a lo puan tawh chu Roy chuan tlem a tih thu a sawi a, cheng nuai 25 aṭanga nuai 30-a tihpun a duh thu a sawi bawk.