Assam sorkarin ramdang mi 47,000 man chhuak

Assam sorkar chuan kum 43 (1971 - 2014) chhungin an state chhungah ram dang mi 47,928 man chhuah an ni tih Ningani khan a tarlang. Ramdang mi an man chhuah zinga 43% chu Hindu an nih tih a sawi bawk.

Asom Gana Parishad MLA Ponakan Baruah zawhna chief minister Himanta-in ziaka a chhannaah, state chhunga ramdang mi rawn lut an man chhuah zat hi chipchiar taka tarlan a ni.

Foreign Tribunal chhinchhiah danin ramdang mi 47,928 zinga 27,309 hi Muslim niin 20,613 chu Hindu an ni. Sakhaw dang vuantu mi paruk an awm bawk. Cachar district aṭanga an man chhuah an tam ber a, mi 10,052 an tling a ni.

Himanta hian Assam Accord chungchang pawh sawilangin March 25, 1971 hnu lama Assam lutte chu zawn chhuaha, electorall roll aṭanga paih an nih bakah an ram lama thawn kir tum an ni tih a sawi.

Assam Chief Minister hian kum 2011 chhiarpui chungchang pawh sawilangin, state chhunga cheng mi vbc 3.12 zinga Assamese ṭawng hmangtu chu 48.38 % an tling a ni, a ti. Bengali ṭawng hmangtu chu 28.92 % an ni bawk.

ASG MLA Baruah hian Assamese ṭawng hmang lo an pung zel chuan tualṭo hnamte tan nghawng ṭha lo a neih mai a hlau tih a sawi chu Sarma chuan chhangletin, sorkar chuan hemi chungchang hi bengkhawn reng a ni, a ti.