Nagaland : Police-ten social media hman dan turah hriattirna tichhuak

Nagaland Police Headquarters chuan thuchhuah siamin, police mi leh sate chu thuruk pawimawh, hma an lak dan tur an sawinate social media platform hrang hranga thawn darh lo turin a hriattir.

Nagaland-ah hian tun hnai khan police-ten district hrang hranga mobile vehicle check-post (MVCP) siam an tumna leh, duty dan tura ruahmanna an siamte chu WhatsApp lama a darh hnuah police headquarters hian social media hman kawnga fimkhur turin thuchhuah a siam ta a ni.

Police hotute chuan phalna nei loa thu pawimawh thawndarh a nih hian misual man kawngah harsatna an tawk thei a, an tum an hlen loh phah thei tih an sawi. Hetianga tite hi hrem theih an ni tih an sawi bawk.

Police Headquarters hian unit commander leh senior officer-te hnenah an hnuaia thawkte chu thuchhuah chungchang hrilhhre turin a chah a, fimkhur thar turin a hriattir a ni.

Nagaland police thuchhuahah hian an mi leh sate mai bakah mipuite chu thu pawimawh an dawnte social media lama thawndarh lo turin an ngen bawk.