Nagaland-ah internet leh SMS service la block

Dimapur-a pawngsual duh loh vanga kawngzawh mipuite'n March 5-a pawngsualtua puh an chilhlum hnuah Nagaland sorkar chuan boruak ṭhalo a thlen venthawn thilah March 7 aṭangin internet leh mobile phone-a SMS service a block a, block hun hi Ninga­ni khan darkar 24 chhung pawhsei leh a ni

Nagaland IGP (Range) Wabang Jamir chuan internet leh SMS service an block chu darkar 24 hnua a tawp hunah block chhunzawm rih turin district thuneitute'n sorkar an ngen leh tur thu a sawi.

Dimapur-a mipui kawng­zawhte'n pawngsualtua puh, Sayed Sarif Khan an sawisakna video an thehdarh hnuah internet (GPRS) leh mobile SMS/MMS service hi March 7 zan aṭangin block a ni.

Nagaland police-te chuan pawngsualtua puh sawisaknaa inhnamhnawih mi 48 an man tawh a, Ningani khan an mi zawn mekte thlalak an tar­chhuak bawk.

Pawngsual leh March 5-a Dimapur thilthleng report Nagaland sorkarin Union Ministry of Home Affairs-a thehluh chungchang chu IGP Jamir chuan sawiin, Nagaland sorkar report buatsaih chu pawngsual tawktu nia sawi, pawng­sualtua puh leh pawngsualtua puh ṭhuihhruai pakhat inpuanna behchhana siam a ni, a ti a, media te chuan an tarlang kim lo a ni, a ti.

Nilaini zan khan media website ṭhenkhat chuan Nagaland sorkarin MHA-a report a thehluh hi tarlangin, pawngsualtua puh, Syed Farid Khan chuan Naga hmeichhia kha a pawngsual lo tiin an tarlang.

Dimapur pawngsual thubuai:

February 24

* Pawngsualtua puh Assam Karimganj district mi, Syed Farid Khan police-in an man

March 4

* Hmeichhia pawl ṭhenkhat Dimapur DC office kawtah lungawi lohna an lantir

* March 4 tlaiah Naga Students' Federation (NSF)-in a tuka nawrh huaihawt an tum thu an puang nghal

* Dimapur DC, Wezope Kenye-a'n Cr.PC section 144 tlawhchhanin curfew a puang

March 5

* Zing dar 7 aṭang dar 11 thleng curfew thlahdul a ni a, thil duhawm lo thleng a awm chuan lekkawh chhunzawm leh nghal tura ruahmanna siam a ni.

* NSF-in pawngsual duh lohin Dimapur-ah nawrh an huaihawt

* Central jail aṭangin pawngsualtua puh Syed Farid Khan an hnukchhuak, kawng an zawhpui hnuah an chilhlum zui

* Curfew lekkawh lehnghal a ni

* Police leh mipuite innawrna­ah mi pakhat a thi

March 6

* Dimapur DC Wezope Kenye, SP Meren Jamir leh Superintendent of Dimapur Central Jail B Chuba Phom te suspend an ni

* DC Kenye aiawh turin Kesonyu Yhome ruat nghal

* Dimapur-a thilthleng chhui chiang turin, mi pakhat awmna Judicial Inquiry din nghal a ni. * District & Sessions Judge hlui, Veprasa Nyekha chu chhui tura ruat a ni.

* Ni 45 chhunga report thehlut tura hriattir nghal a ni bawk

March 7

All Assam Muslim Yuba Parishad (S)-in Muslim mi, pawngsualtua puh sawisak hlum a nih vangin Guwahati-a Nagaland House kawtah lungawi lohna an lantir.

* Nagaland sorkarin Telecommunications Ministry-a internet leh SMS service block tura a ngenna chu tihpuitlin a ni a, block nghal a ni.

* Syed Farid Khan ruang chu a pianna khua, Assam, Karimganj district-a Bosla khuaah Army helicopter-a lak a ni a, vuiliam nghal a ni.

March 9

* Nagaland-a jail tangte venhimna chungchangah Rajeev Kalita-in Gauhati HC-ah PIL a thehlut.

* Mipui leh police te innawrnaa thi chhungte hnenah zângnadawmna Rs nuai khat leh hliam tuarte hnenah Rs 50,000 ṭheuh pek an nih tur thu Nagaland sorkarin a puang

March 10

Gauhati HC-in jail tang te himna ngaihtuahsak turin Nagaland sorkar a hriattir