Assam-in NFSA kalpui tur dansakah sorkar laipui a puh

Assam sorkar chuan sorkar laipuiin National Food Security Act kalpui ṭan a remtihsak lo a nih chuan nakkuma assembly inthlan neih hmaa NFSA kalpui tir loh tumna a ni ang, a ti.

Assam Food and Civil Supplies minister Nazrul Islam chuan he thu hi sawiin, "NFSA kalpuina atan sorkar laipui kan be leh ang a, mahse rem an la ti lo fo a nih chuan nakkuma state assembly inthlan neih hmaa NFSA min kalpui tir loh an tumna a ni ang," a ti.

"UPA sorkarin NFSA a ruahmanah hian a kalpui dan tur compute­rised tumna a awm lo a, mahse NDA a sorkar hnuah NFSA chu kalpui ṭan a nih hmain computerised vek tur a rawn ti leh a, UPA sorkar lai khan state 11-in NFSA hi an kalpui ṭan tawh a ni," a ti.

Food and Civil Supplies minister Islam chuan chuan ration card cumputerised hna chu 75% thawh zawh tawh a nih thu leh hun rei lote chhunga peihfel hman an tum thu a sawi bawk.

State ṭhenkhatin NFSA an kalpui tawh laia Assam-a kalpui ṭan loh chungchangah AGP MLA Keshab Mahanta chuan assembly session-ah zawhna a lo siam tawh a, Minister Islam chuan chhangin, public distribution system-ah thil fel lo a awm avang leh sorkar laipuiin Assam tana harsatna tam tak a siamsak vangin NFSA an kalpui ṭan thei lo, a ti.

Assam Food Minister Islam chuan public distribution system-a thil fel lo awmte chu theihtawp chhuaha anmahni bial ṭheuha bawhzui turin MLA te a ngen bawk.