Manipur-in power siamchhuah kawngah pawn lam ṭanpuina ngen

Manipur Chief Minister Okram Ibobi Singh chuan Manipur-a power siamchhuah kawngah state pawn lam ṭanpuina a ngen.

Delhi Dialogue vawi sarihna neihah Ningani khan Ibobi chuan he thu hi sawiin, sorkarin Act East Policy kal­tlanga India leh ASEAN ramte thawh hona ṭha nei tura a beihna hnuai­ah Manipur-a power siam­chhuah theihte chu siam­chhuah kawngah Manipur thawhpui turin sorkar laipui a ngen.

"Power chu Manipur hmasawnna atana thil pawimawh a ni a, mipuite mamawh leh industry lama power mamawhna phuhruk nan ringawt ni loin state pawn lama hralh­chhuah atan pawh nise power siamchhuahna remchang tam tak kan nei a ni," a ti.

"Hydro power project kalpuina atan hmun eng emaw zat chu ruahman tawh a ni a, hemi aṭang hian power megawatt 1784 siamchhuah theih a ni a, mahse tunah hian MW 105 chauh la siam­chhuah a ni. Hemi atan state pawn lam aṭanga ṭanpuina kan mamawh a ni," tiin a sawi. Ibobi chuan Indo-ASEAN thawh hona chu hmarchhak state tana a pawimawh thu sawiin, inkalpawhna changtlung a awm theihna atan te, hna thawh tur siamna atan te, sum lakluh tihpunna atan leh eizawnna ngelnghet siamna atan te a ṭangkai dawn a ni, a ti.

Manipur mamawh chungchangah CM Ibobi chuan ASEAN ramte hnena lirtheia inkalpawhna kawngpui ṭha leh bus service changtlung tak siam thuai a ṭul thu a sawi a, chu chu ei leh bara Manipur dinhmun siamṭhatna tur a nih thu a sawi bawk.

Ibobi chuan Myanmar ramri khua, Moreh-ah rel luhtir a pawimawh thu a sawi bawk.