Dimapur boruak a ziaawm
Pawngsual duh loh vanga kawngzawh te'n March 5-a Nagaland, Dimapur Central Jail-a tang, pawngsualtua puh an sawisak hlum avanga boruak ṭha lo thleng chuan ziaawm lam a pan tawh a, CrPC Section 144 tlawhchhana curfew puan pawh kar kalta Zirtawpni zan aṭang khan hlih a ni a, internet, SMS leh MMS service block pawh hlih a ni bawk.
Dimapur Additional Superintendent of Police (ASP) Shoukha Kakheto chuan pawngsualtua puh sawisak hlumnaa inhnamhnawih mi pahnih an man belh thu sawiin, mi 52 an man tawh thu a sawi. An mi man pahnih zinga pakhat chu naupang kumtlinglo a nih avangin juvenile justice board kuta hlan a nih thu a sawi.
Kar kalta khan Nagaland police te chuan pawngsualtua puh sawisak hlumnaa a mawhphurtua rinhlelh mi 24 thlalak tar chhuakin a zawn beihpui an lo thlak tawh bawk a ni.