Sharmila campaign thlawp nan Delhi-ah chaw ngheia nawrh huaihawt

Delhi-a pawl pali - Save Sharmila Solidarity Campaign (SSSC), Association of Protection of Civil Rights (APCR), Lok Raj Sangathan (LRS) leh Students Islamic Organisation of India (SIOI) chuan Armed Forces (Special Powers) Act, 1958 hlih phuta kum 14 chuang chaw ngheia nuar tawh, Irom Sharmila an thlawpna lantir nan kar kalta Inrinni khan Delhi-ah chaw ngheia nawrh an huaihawt.

SSSC, APCR, LRS leh SIO te hian thu­chhuah an siamah Mumbai, Panipat leh Lucknow bakah Korea-a anmahni thlawptute chuan an awm hmun­ah ṭheuh chaw an nghei ve thu an tarlang tel.

Pawl pali te hian AFSPA hlih phutin Prime Minister hnenah memorandum an thehlut nghal a, Manipur sorkarin IPC section 309 tlawh­chhana mahni intihhlum tuma Sharmila thubuai a siamsak chu hlihsak an phut thu an tarlang bawk.

Tlawmngai pawlte hian Prime Minister Narendra Modi-a'n kum 2014 Lok Sabha inthlan neih hmaa AFSPA hlih a lo tiam tawh thu tarlangin, "Democracy kalphung­ah chuan mipuite âw ngaihthlak a pawimawh a, sorkar inrelbawlna ṭha leh mihring nungphung dik a awm theihna atan pawh AFSPA hi hlih a ṭul a ni," an ti.

SSSC hruaitu, Ravi Nitesh chuan AFSPA hlih phut vanga chaw ngheia nuar, Sharmila-i thubuai siamsak a ni ṭhin chu vanduaithlak a tih thu leh democracy kal­phung lo a tih thu a sawi a, sorkar chuan a thil phut aiin thubuai siamsak lam a ngaihven zawk a ni, a ti.