Hmarchhak state khawpuiah rel luhtir vek tum

Indian Railways chuan hmarchhak state khawpuite chu rela inkal­pawh theih vek tura thlun­zawm a tum.

Union Minister of State for Railways Manoj Sinha chuan he thu hi Rajya Sabha inkhawm­ah sawiin, hmarchhak state khawpuite chu rel hmang­a thlunzawm vek an tum thu a sawi a, mahse a tihpuitlinna atan an hun bithliah a tarlang lo.

Sinha chuan hmar­chhak bial leh Assam-a Railway infrastructure tihchangtlun nan cheng vaibelchhe 47,909 hu project kalpui mek a ni, a ti a, kum 2015-16 Budget-ah pawh hmarchhak biala rel kawng kilometre 278 siamna tur, cheng vaibelchhe 2,777 dah a ni, a ti.

Sorkar laipui chuan kum 2014-15 Budget-ah hmarchhak biala rel kawng siamna leh Railway service tihchangtlun nan vaibel­chhe 5,215 a dah a, financial year thar, 2015-16 atan cheng vaibelchhe 5,338 dah leh bawk.

Railways Minister Sinha chuan project kalpui mekte peihfel hun chu forest clearance, dan leh thupek dinhmun bakah mimal ram laksak dan kalphung tihfel hunah a innghat a ti.