Ibobi-a'n assembly-ah MRVT Bill a pharh

Manipur Chief Minister Ibobi Singh chuan state chhunga pemlutte khuahkhirhna atana rua­hman, Manipur Regulation of Visitors, Tenants and Migrant Workers Bill (MRVT)-2015 chu kar kalta Zirtawpni khan assembly house-ah a pharh.

Assembly budget session hi March 3 khan a tawp a, mahse MRVT Bill atan pawhsei a ni a, March 5 aṭanga March 9 thleng hi Yaoshang festival chawlh a nih avangin assembly ṭhutkhawm hi kar kalta Zirtawpni aṭanga chhunzawm a ni a, vawiin hian sawi hoa pass tum a ni.

MRVT Bill hi pass a nih chuan infrastructure siamna atan state sorkar­in cheng vaibelchhe 10 vel a mamawha chhut a ni a, hna thawktute thla hlawhah kum khat­ah cheng nuai 80 zel a mamawh bawk ang.

Chief Minister Ibobi chuan bill chu pemlutte lak aṭanga Manipur leilung fate humhalhna atana ruahman a nih thu a sawi a, sawi ho hnuah awlsam taka pass theih a beisei thu a sawi.

Manipur-a inner line permit kalpui ngiattu, Joint Committee on ILPS (JCILPS)-in pemlutte khuahkhirhna atana dan siam tura nasa taka sor­kar a nawr hnuah state sorkar chuan nikum khan deputy chief minister Gaikhangam kaihhruaina hnuaiah All Political Parties’ Committee on Inner Line Permit System a din a, committee chuan zirchianna a neih hnuah nikum December 10 khan report a thehlut a, MRVT Bill hi committee rawtna zulzuia buatsaih a ni.